Pagahatagan sa dakbayan sa Valencia og libreng 64-square-meter nga mga lote ug housing assistance gikan sa pondo nga kapin ₱19 milyon ang 160 ka pamilyang nabiktima sa pagbaha niadtong Septyembre 2025 ug ang mga naapektuhan sa demolisyon sa Pacoma Site.
Kini ang pangunang gipahibalo sa gobyerno sa dakbayan atol sa gipahigayon nga “Kapehan kauban ang Valencia City Press Corps (VCPC)” niadtong Hulyo 20, 2026 didto sa City Mayor’s Conference Room, isip kabahin sa paningkamot nga makahatag og luwas ug permanente nga puy-anan sa mga molupyo.
Sumala sa lokal nga kagamhanan, nahuman na ang pag-abli sa mga dalan ug pagsubay sa mga lote sa relocation site sa Barangay Pinatilan, samtang nagpadayon pa ang pag-lote sa relocation site sa Barangay Lumbo. Ang pag-validate sa mga benepisyaryo gipahigayon sa CSWDO ug CDRRMO samtang ang City Housing Office maoy naghupot sa opisyal nga listahan, diin gilauman nga ipahigayon na sa umaabot nga semana ang ceremonial signing, awarding sa mga lote, ug ang pag-apod-apod sa mga construction materials alang sa pagtukod sa mga balay.
Ang maong pulong-pulong gipasiugdahan sa Public Information and Assistance Division (PIAD) nga gidumala ni Aron Rempohito, ubos sa suporta ni Mayor Amie G. Galario ug Vice Mayor Greizl Galario-Fernandez. Mitambong usab ug nitubag sa mga pangutana sa media sila City Spokesperson Jun Galario, City Planning Coordinator Engr. Marlino Guerrero, City Engineer Engr. Rodina Onting, CDRRMO Head Jun Ray Valero, ug VCPC President Ruben Geralla
Photo Courtesy: LGU – Valencia City
