Gipahigayon ang usa ka project demonstration visit sa mga kadagkoan sa kagamhanan aron susihon ang 1.20-kilometer farm-to-market road nga gipatuman sa Barangay Pigtauranan, Pangantucan, Bukidnon. Ang maong proyekto nga nagkantidad og PHP 33,330,900.32 gipondohan pinaagi sa Department of Trade and Industry (DTI) – RAPID Growth Project kauban ang International Fund for Agricultural Development (IFAD), diin gidugangan usab kini og kapin PHP 4.8 milyon nga equity gikan sa Lokal nga Kagamhanan (LGU) sa Pangantukan.
Sumala ni DTI Bukidnon Provincial Director Famelah Raquel Villanueva, ang maong kalihukan nagtumong sa pagsusi sa implementasyon sa proyekto kauban ang oversight committee nga gilangkuban sa mga undersecretary gikan sa Department of Finance (DOF) ug Department of Budget and Management (DBM). Ang karsada gidesenyo ubos sa “market-driven approach” aron suportahan ang Bayanihan Linayon Multi-Purpose Cooperative, nga giila nga usa sa mga nag-unang coffee hubs ubos sa Bukidnon Coffee Roadmap nga prayoridad nga programa ni Gobernador Rogelio Neil Roque.
Gawas sa imprastraktura, ang maong programa naghatag usab og mga pagbansay, ekipo, ug koneksyon sa merkado aron mas masiguro ang dakong kita sa mga mag-uuma sa kape.
Mipadayag usab og dakong kalipay si Gobernador Roque ug ang lokal nga komunidad tungod kay ang maong kalamboan dili lang makatabang sa mga mag-uuma nga makabaligya sa ilang abot, kondili magpalig-on ug magpalambo usab sa ekonomiya sa tibuok lalawigan sa Bukidnon
Photo Courtesy:Municipality of Pangantucan
