Gipahugtan sa lokal nga panagamhanan sa Malaybalay City ang pagpatuman sa “Oplan Dakip Aso”subay sa Republic Act 9482 (Anti-Rabies Act of 2007) ug City Ordinance No. 668.
Sa kasamtangang mga operasyon sa nagkadaiyang barangay sama sa Barangay 3, 5, 6, 8, 9, Patpat, Casisang, ug Sumpong, napulo na ka mga iro ang nadakpan ug gidala sa City Vet Impounding Facility. Ang mga tag-iya nga gustong maglukat sa ilang mga binuhi kinahanglang magbayad og multa nga nagkantidad og ₱1,100 (apil na ang impoundment fee, no leash fee, ug registration fee), diin makadawat sab ang iro og libreng bakuna batok sa rabies sa dili pa buhian.
Pasidaan sa City Vet nga ang mga iro nga dili malukat o walay moadopt sulod sa gitagal nga panahon mahimong ipa-euthenize o pagapatyon sumala sa legal nga pamaagi sa balaod.
Tungod niini, gipahinumdoman ni City Mayor Jay Warren Pabillaran ug gipaningkamotan sa lokal nga gobyerno ang pag-apelar sa tanang lumulupyo nga mahimong responsable nga dog owners—ihikot ug tagadahon sa sulod sa tugkaran ang mga inalimahan aron makadaginot sa pondo ug malikayan ang mga dili gustong disgrasya.
Tumong sa maong operasyon ang pagpanakop sa mga stray dog o latagaw nga mga iro sa kadalanan aron mapanalipdan ang komunidad batok sa hulga sa rabies, malikayan ang mga aksidente sa dalan nga kasagaran mugna sa mga nagmotor, ug mamintinar ang kalimpyo sa palibot
Photo Courtesy: City Veterinary Office – Malaybalay
