Daling girespondihan sa mga otoridad ang pagdahili sa yuta sa Sitio Colilisi, Barangay Tagabakid, Mati City, Davao Oriental human nakasinati ug kusog nga pagbundak sa ulan pasado alas 11:00 sa gabii niadtong Hulyo 18, 2026.
Sumala sa Mati City Police Station ug sa City Disaster Risk Reduction and Management Office (CDRRMO), nadawat nila ang taho banda alas 2:20 sa kaadlawon niadtong Hulyo 19 ug daling naghimo ug clearing operations uban sa koordinasyon sa ubang mga ahensya sa gobyerno aron nga madali ang pagbakwit sa mga residente.
Base sa report, adunay usa ka residente ang nakaangkon og mga samad tungod sa maong kalamidad ug daling gihatagan og medikal nga pag-atiman sa mga responder. Samtang ang mga apektadong residente gilayong gipabakwit ngadto sa Tagabakid Covered Court ug Tagabakid Elementary School aron masiguro ang ilang kaluwasan.
Sa pagkakaron padayon ang pagmonitor sa mga otoridad sa maong lugar ug giawhag ang publiko nga magpabiling mabinantayon ug mosunod sa mga opisyal nga pahimangno aron malikayan ang bisan unsang kadaot.
Photo Courtesy: Mati CPS
