Patay ang duha ka tawo samtang tulo ang naangol human naaksidente ang usa ka Suzuki Multicab sa bahin sa Sayre Highway sa Purok 3, Barangay Base Camp, Maramag, Bukidnon niadtong Lunes, Hulyo 20, 2026, sa mga alas 2:00 sa kaadlawon.
Base sa taho sa kapolisan, giila ang mga namatay nga mao ang 48-anyos nga lalaking driver ug usa ka 46-anyos nga babayeng pasahero nga parehong gideklarang Dead on Arrival (DOA) sa Bukidnon Provincial Hospital (BPH) – Maramag. Samtang ang tulo pa ka lalaking pasahero pulos anaa sa legal nga pangidaron padayon pang gitambalan sa maong tambalanan human nakaangkon og seryosong mga kadaot sa lawas.
Subay sa inisyal nga imbestigasyon, nagbiyahe ang sakyanan gikan sa poblacion sa Maramag padulong sa Barangay San Roque sa dihang nitunob sa preno ang drayber. Apan tungod sa kusog nga ulan ug sa kadanlog sa karsada, nawad-an kini og kontrol sa manobela hinungdan nga nideretso ang multicab sa kilid sa karsada ug kusog nga mibangga sa usa ka sementadong culvert.
Tungod sa kakusog sa impact, naipit ang driver samtang nangalagpot gawas sa sakyanan ang upat ka pasahero. Sa karon, pabilin pa sa lugar nahitaboan ang nalambigit nga sakyanan alang sa inspeksyon ug tukmang disposisyon.
Photo Courtesy:Maramag Municipal Police Station
