Magpatuman ang administrasyon ni US President Donald Trump og mas hugot nga lagda sa pagpabilin sa mga langyawng estudyante ug mamamahayag sa Estados Unidos isip kabahin sa pagpalig-on sa polisiya sa legal nga imigrasyon.
Ubos sa bag-ong lagda nga posibleng ipatuman sugod sa Septyembre, ang mga langyawng estudyante nga adunay student visa tugotan lamang nga magpabilin sulod sa gidugayon sa ilang kurso, apan dili molapas og upat ka tuig.
Samtang ang mga langyawng mamamahayag mahimong magpabilin sulod lamang sa 240 ka adlaw o mga walo ka bulan, nga mahimo pang mapalugway pinaagi sa aplikasyon. Alang sa mga Chinese nationals, 90 ka adlaw lamang ang gitugot nga pagpabilin, nga mahimo usab mapalugway og laing 90 ka adlaw.
Gisaway sa mga organisasyon nga nagpanalipod sa kagawasan sa media ang maong lakang. Matud sa Reporters Without Borders ug Committee to Protect Journalists, mahimong makababag kini sa trabaho sa mga langyawng mamamahayag ug makapakunhod sa kagawasan sa pagbalita sa Estados Unidos.
Sa laing bahin, gipasabot sa Department of Homeland Security nga gituyo ang bag-ong lagda aron mapalig-on ang pagmonitor sa mga visa holder ug mapugngan ang mga langyaw nga magpabilin sa nasod pinaagi sa padayon nga pagpalugway sa ilang pag-eskwela.
Ang bag-ong polisiya pagausisahon pa sa Kongreso sa Estados Unidos sa dili pa kini hingpit nga ipatuman.
