Palapdan sa Singapore-based nga ABC Impact Pilipinas ang pamuhunan sa pilipinas pinaagi sa dugang kapital niini sa AC Health, ang healthcare arm sa Ayala Corporation.
Sumala sa Department of Trade and Industry (DTI), ang maong pamuhunan makatabang sa pagpalapad sa serbisyo sa panglawas pinaagi sa pagdugang sa hospital bed capacity ug pagtukod pa og dugang nga mga ospital, klinika, ug retail pharmacies sa tibuok nasud.
Gilauman usab nga makamugna kini og kapin sa 10,000 ka bag-ong trabaho alang sa mga healthcare professionals ug retail workers.
Target sa AC Health nga mapalapad ang ilang network ngadto sa labing menos 10 ka ospital, 300 ka klinika, ug 1,150 ka botika sa tibuok nasud sa dili pa matapos ang 2027.
Matod ni Trade Secretary Cristina Roque, ang dugang pamuhunan maoy timaan sa lig-on nga pagsalig sa ekonomiya sa Pilipinas ug sa abilidad sa mga Filipino healthcare workers. Dugang pa niya, mas mapaduol ang dekalidad nga serbisyo sa panglawas ngadto sa daghang komunidad samtang nagbukas usab kini og dugang pang mga oportunidad sa trabaho.
Photo Courtesy:Linkedln
