Sugdan sa Department of Social Welfare and Development (DSWD) niining semana ang pagpatuman sa gipalapdang Unified Package for Livelihood, Industry, Food and Transport (UPLIFT) cash assistance program nga makatabang sa kapin 7.5 milyon ka kabus, hapit-kabus, ug ubos og kita nga mga panimalay sa tibuok nasod.
Sumala ni DSWD Secretary Rex Gatchalian, ang programa gituyo aron matabangan ang mga pamilyang naapektuhan sa pagsaka sa presyo sa lana ug uban pang epekto sa energy emergency nga may kalabotan sa tensiyon sa Middle East.
Ang mga benepisyaryo gibahin sa tulo ka grupo: 3.5 milyon ka panimalay ubos sa 4Ps ug Walang Gutom Program, 2.5 milyon ka kabus nga mga panimalay nga naila pinaagi sa Community-Based Monitoring System (CBMS) sa Philippine Statistics Authority, ug 1.5 milyon ka ubos og kita nga miyembro sa Social Security System (SSS).
Ang mga benepisyaryo sa 4Ps ug Walang Gutom Program makadawat og usa ka higayon nga ₱2,000 nga ayuda, samtang ang mga kwalipikadong benepisyaryo sa CBMS ug SSS makadawat og ₱2,000 matag bulan sulod sa unom ka bulan, sugod Hulyo hangtod Disyembre.
Alang sa mga bag-ong benepisyaryo sa CBMS, magpatuman una ang DSWD og manual payout aron mapamatud-an ang ilang identidad sa dili pa ibalhin ngadto sa digital payment system. Gipasabot usab sa ahensya nga ang listahan sa mga benepisyaryo gikan lamang sa Philippine Statistics Authority ug wala giagi sa bisan unsang politiko o opisyal sa gobyerno.
Photo Courtesy: Philippine News Agency
