Gikasubo nga gipahibalo sa Philippine Eagle Foundation (PEF) niadtong Sabado ang pagkamatay sa Philippine Eagle nga ginganlan og Sawaga-Dalwangan samtang kini nagpaalim ug nagpaubos sa rehabilitasyon sa Philippine Eagle Center sa Davao City.
Hisayrang ang maong agila unang na-rescue sa usa ka kabukiran sa barangay Dalwangan Malaybalay City Bukidnon human kini giingong giatake sa usa ka grupo sa mga unggoy. Bisan pa man og nagpakita kini og maayong pagbawi sa iyang kusog—pinaagi sa pagkahimo nga mas alerto, pagkaon sa kaugalingon, ug maayong pag-responde sa pagtambal—kalit lang kining nakasugamak og medical crisis o komplikasyon sa panglawas nga maoy hinungdan sa iyang pagkamatay nga wala na natabang pa sa mga beterinaryo.
Subay niini, nagpadayag sa ilang dakong pagpasalamat ang PEF ngadto sa komunidad sa Daraghuyan, sa rescuer nga si Marven Linoy ug iyang mga kauban, DENR, Malaybalay City Government, Provincial Zoo, ug sa tanang veterinary teams nga nagtinabangay sa pagluwas kaniya.
Gipasalig sa pundasyon nga bisan pa man sa maong masulub-ong panghitabo, dili gihapon kawang ang pag-rescue kay Sawaga-Dalwangan tungod kay ang mga leksyon ug kasagaran nga natun-an gikan sa iyang kaso magamit og dako aron mas mapalambo pa ang pag-atiman sa uban pang mga Philippine Eagle sa nasod sa hinaharap
Photo Courtesy: PEF
