Nagpadayon karon ang clearing operations didto sa Sitio Overview, Barangay Kalagangan, San Fernando Bukidnon kung asa sulod na sa 12 ka adlaw nga dili maagian sa mga bus ug dagkong sakyanan ang maong dalan tungod sa dako nga landslide.
Sumala kang Barangay Captain Budok Elarco sa eksklusibong pakighinabi sa Juander Radyo Malaybalay, mao na kini ang pinakagrabeng landslide nga nahitabo sa ilang barangay, ug sa pagkakaron, mga single nga motorsiklo lamang ang makalabay sa maong lugar. Misamot pa ang problema human usab mahugno ang bahin sa dalan sa Buda, nga maoy alternatibong rota sa mga biyahero.
Alayon niini, nanawagan si Kapitan Elarco sa Gobernador, Kongresista, Mayor, ug DPWH Regional Office alang sa dugang ekipo ug suporta aron dali nga maablihan ang maong dalan ug mabalik sa normal ang transportasyon ug panginabuhi sa mga residente
Kahibaloang naghiusa na ang DPWH, LGU San Fernando, ug usa ka contractor sa pagpadala og mga backhoe, bulldozer, loader, ug dump truck aron mapadali ang clearing operations.
Apan bisan pa niini, dako na ang epekto sa panginabuhi sa mga negosyante ug biyahero, ilabina sa mga nagadala og mga produkto padulong sa Tagum tungod dili pa maagian sa mga delivery truck.
Photo Courtesy:LDRRMO San Fernando
