Patay ang usa ka lalaki human kini miambak gikan sa overpass nga adunay gihabogong 40 hangtod 50 feet didto sa Purok 19, Musuan, Barangay Dologon, Maramag, Bukidnon niadtong Hulyo 18, 2026, alas 3:15 sa hapon.
Girespondihan gilayon human nakadawat og tawag ang Maramag Municipal Police Station gikan sa Rescue Maramag bahin sa maong insidente. Daling gidala ang biktima sa Bukidnon Provincial Hospital (BPH)–Maramag alang sa hinanaling pagtambal, apan pormal kining gideklarar nga Dead on Arrival (DOA) sa attending physician tungod sa seryosong traumatic head injury nga iyang naangkon gikan sa pagkahulog.
Subay sa gihimong imbestigasyon sa kapolisan kauban ang pamahayag sa kabanay sa biktima, nasayran nga nag-antos kini sa depression, nga maoy giingong nagdani kaniya sa paghimo sa maong aksyon. Gipahayag usab sa mga nag-imbestigar nga walay nakitang bisan unsang timailhan sa foul play sa lawas sa biktima.
Sa kasamtangan, gipahiluna na sa pamilya ang patay’ng lawas alang sa husto ug desente nga disposisyon.
Photo Courtesy:Maramag Municipal Police Station
