Gipaambit ni Office of Civil Defense Region 10 kon OCD-X Regional Director Antonio Sugarol nga ang pagpangandam sa panahon sa kalamidad usa ka dako nga responsibilidad sa matag usa.
Atol sa Kapihan sa PIA gihusgutan ang pagsaulog sa National Disaster Resilience Month kung asa gipasalig pag-usab sa Office of Civil Defense ang ilang tinguha nga mas palig-onon pa ang koordinasyon ug pagpangandam batok sa mga katalagman sa tibuok rehiyon.
Atol sa kalihokan, nagtinabangay usab sa pagpaambit sa ilang mga pamaagi ang nagkadaiyang ahensya sa kagamhanan. Lakip sa ilang gihisgutan ang mga inobasyon nga nakabase sa siyensya, pagpangandam sa sektor sa agrikultura, mga pinakabag-ong update sa panahon, ug mga lakang sa pagresponde aron matabangan ang mga komunidad nga makalikay sa mas dakong peligro.
Mahinungdanon sab ang panawagan alang sa padayong pagtinabangay sa mga ahensya sa gobyerno, lokal nga kagamhanan (LGU), media, ug sa tibuok publiko.
Dugang ni Sugarol nga dakong kabahinan ang panaghiusa sa tanan alang sa pagtukod og mas luwas, andam, ug lig-on nga mga komunidad batok sa kalamidad sa tibuok Northern Mindanao.
Photo courtesy: DSWD-Northern Mindanao
