Giawhag sa City Local Environment and Natural Resources Office (CLENRO) ang tanang barangay sa dakbayan nga motuman sa Solid Waste Management Program ug sa mga patakaran sa lokal nga kagamhanan aron mapadayon ang kalimpyo sa palibot.
Sumala ni CLENRO Manager Bing Mabellin, padayon ang paningkamot sa ilang buhatan sa pagpatuman sa ilang mandato, apan mas mahimong epektibo ang pagdumala sa basura kung adunay panaghiusa ug kooperasyon gikan sa mga residente, barangay officials, ug ubang stakeholders.
Gipasiugda ni Mabellin nga ang pagmintinar sa kalimpyo sa komunidad usa ka shared responsibility o hiniusang obligasyon sa matag usa. Dugang pa niya, importante nga maminusan ang gidaghanon sa basura nga madala ngadto sa landfill aron malikayan nga dali kining mapuno.
Busa, gi-awhag sa CLENRO ang publiko nga mahimong responsable sa hustong paglabay ug pagdumala sa basura alang sa mas limpyo ug luwas nga palibot.
Photo courtesy: CLENRO CdeO
