Gipasalig sa Maynilad Water Services Inc. nga andam ang kompanya sa posibleng epekto sa El Niño bisan pa nga miubos na sa kritikal nga lebel ang tubig sa Angat Dam. Matod sa kompanya, padayon ang ilang mga lakang aron masiguro ang walay hunong nga suplay sa tubig ngadto sa ilang mga konsumer.
Bisan nakatabang ang mga pag-ulan nga dala sa bagyong Inday ug sa kusog nga habagat aron mapahinay ang pagkunhod sa lebel sa tubig sa dam, gipahayag sa Maynilad nga nagpadayon gihapon sila sa pagpangandam alang sa lain-laing posibleng kahimtang. Lakip sa ilang gihimong mga lakang ang mas hugot nga pagdumala sa water pressure line, paggamit sa regulating valves, ug koordinasyon uban sa mga ahensya sama sa DENR, MWSS, ug PAGASA.
Matod ni Maynilad spokesperson Jen Rufo, mas andam na karon ang kompanya kumpara sa panahon sa El Niño niadtong 2019. Giingon niya nga mas daghan na sila og dugang nga tinubdan sa tubig, mas gamay na ang water losses tungod sa pag-ilis sa mga daang tubo, ug adunay na usab sila mga alternatibong source sama sa Laguna Lake, reused water, ug modular treatment plants.
Gipahayag sa Maynilad nga dakong tabang ang ilang mga pagpangandam aron maminusan ang epekto sa posibleng grabe nga hulaw ug kakulang sa tubig. Sumala sa PAGASA, miubos sa mga 155 metros above sea level ang lebel sa tubig sa Angat Dam niadtong Miyerkules, nga mas ubos sa critical level nga 160 metros ug layo sa normal nga operating level sa maong dam.
Photo Courtesy:Maynilad
