Giduso sa 10th Sangguniang Panlungsod sa Valencia, ubos sa pagpangulo ni Vice Mayor Greizl Galario-Fernandez, ang sunod-sunod nga mahinungdanong ordinansa ug resolusyon Hulyo 13, 2026, nga nagtumong sa pagpalambo sa ekonomiya, modernisasyon sa agrikultura, ug pagpalapad sa serbisyong panglawas.
Usa sa mga nag-unang lakang nga gituki sa konseho mao ang sugyot ni City Mayor Amie Galario bahin sa pagkompleto sa mga dokumento alang sa loan gikan sa Land Bank of the Philippines (LBP) nga nagkantidad og ₱2.74 bilyon alang sa mga prayoridad nga imprastraktura ug kalamboan sa dakbayan.
Dungan niini, gihatagan usab og prayoridad sa konseho ang pag-endorso sa Kalimunda Wetland Management Plan (CY 2026–2030) didto sa Barangay Sugod alang sa pagpreserba sa kalikopan. Gi-aprobahan usab ang pakigtambayayong sa Department of Agriculture (DA RFO X) alang sa pagtukod og duha ka Mushroom Production Centers nga nagkantidad og ₱800,000 ug pagpalit og usa ka walking-type agricultural tractor nga nagkantidad og ₱100,000 aron matabangan ang mga lokal nga mag-uuma.
Gi-asikaso usab sa konseho ang pagmugna sa CHO–Fortich Street Pharmacy isip opisyal nga “Fourmula 1+ Botika ng Bayan” human mabalhin ang City Health Office sa Poblacion, aron makahatag og baratong tambal ug bakuna sa mga residente.
Ang maong mga lakang pormal nang gitumong ngadto sa mga haom nga komite sa konseho alang sa mas lawom nga pagtuon ug dinalian nga aksyon sa dili pa ang hingpit nga implementasyon niini.
Photo Courtesy: LGU – Valencia City
