Gikalot pag-usab sa mga otoridad niadtong Hulyo 9, 2026 ang usa ka patayng lawas nga napalgang gisulod sa sako didto sa Pulangi River, Malidegao, Special Geographic Area Bangsamoro Autonomous Region in Muslim Mindanao (SGA)-BARMM aron ipailalom sa DNA test.
Kini tungod sa posibilidad nga kini mao ang 31-anyos nga hiker nga si Alkharj Zamayla, kinsa gikatahong namissing human misaka sa Mt. Kalatungan, Bukidnon niadtong Hunyo 12.
Nilusad ang maong exhumation human nakig-coordinate ang pamilya sa missing hiker tungod kay nagtugma ang deskripsyon sa sinina sa patayng lawas sa katapusang suot sa ilang kabanay. Gawas sa pag-ila sa biktima, gisusi usab sa Malidegao Police ang anggulo nga adunay foul play o krimen tungod kay gihiktan ug gisulod sa sako ang lawas sa wala pa kini gilabay sa suba.
Sa pagkakaron, nakuha na ang DNA sample sa patayng lawas aron itandi sa sample sa igsoon sa biktima pinaagi sa Provincial Forensic Unit sa Police Regional Office Bangsamoro Autonomous Region (PRO BAR), apan gipaabot nga molungtad pa og pipila ka bulan ang resulta.
Padayon usab ang koordinasyon sa Bukidnon ug Malidegao Police alang sa dugang nga imbestigasyon sa maong hitabo
Giklaro sab ni Police Capt. Ernie Cabrera, hepe sa Pangantucan Municipal Police Station sa pakighinabi sa Juander Radyo Malaybalay nga wala pay kumpirmasyon kung ang patay nga lawas nga nakaplagan mao ba gyud ang nawalang hiker tungod kay anaa na kini sa advanced state of decomposition.
Photo Courtesy:Malidegao Police SGA-BARMM
