Mokabat sa ₱3,231,000.00 ang kinatibuk-ang kantidad sa hinabang nga nadawat sa 59 ka mga kanhi rebelde (FRs) sa Bukidnon ubos sa Enhanced Comprehensive Local Integration Program (E-CLIP) sa Department of the Interior and Local Government (DILG). Gihimo ang maong pagtunol sa Third Batch Release of Assistance niaging Hulyo 9, 2026, didto sa Headquarters sa 403rd Infantry Brigade, Camp Osito D. Bahian, Impalambong, Malaybalay City.
Gipangulohan sa DILG-Bukidnon ni Provincial Director Rhona Pedraza-Abadilla ang maong kalihokan, diin nagtinabangay ang nagkadaiyang ahensya sa gobyerno ug ang security sector.
Naglakip ang nadawat nga financial package sa dinalian nga financial aid, livelihood assistance, ug uban pang mga benepisyo nga nagtumong sa pagtabang kanila nga makasugod og bag-ong kinabuhi, makabaton og kaugalingong panginabuhian, ug malampuson nga makabalik sa ilang tagsa-tagsa ka pamilya ug komunidad isip malinawong lungsuranon.
Sa kinatibuk-ang ihap sa mga benepisyaryo, 37 kanila ang giasistihan ug gi-coordinate sa 89th Infantry (Makatao) Battalion nga gipangulohan ni Lieutenant Colonel Antonio G. Bulao I, human sila naluwas gikan sa area of responsibility sa maong yunit. Mitambong usab sa distribution silang Lieutenant Colonel Eric S. Dema-ala (Executive Officer sa 403rd Infantry Brigade), Police Colonel Oliver S. Navales (Provincial Director sa Bukidnon Police Provincial Office), ug Ms. Angelou Kaye Laureto (Ulo sa Balay Ta Kalinaw) aron subling ipadayag ang ilang hugot nga suporta sa maong programa sa kalinaw.
Photo Courtesy: DILG Bukidnon
