Sugod Agosto 1, tangtangon na sa Securities and Exchange Commission (SEC) ang moratorium o ban sa pagparehistro sa bag-ong online lending platforms (OLPs).
Ang SEC nagpatuman usab og bag-ong mga lagda aron mapalig-on ang pagdumala sa mga financing ug lending companies, maprotektahan ang mga konsumidor, ug mapugngan ang mga abusadong pamaagi sa pagpautang.
Bisan giwagtang na ang ban, dili kini pasabot nga awtomatikong maaprubahan ang tanang bag-ong online lending apps kay kinahanglan gihapon nilang motuman sa tanang regulasyon sa SEC.
Ubos sa bag-ong palisiya, gipataas sa SEC ang minimum paid-up capital sa mga financing ug lending companies depende sa gidaghanon sa ilang online lending platforms. Gitakda usab nga hangtod lima lamang ka OLP ang mahimong operahon sa matag kompanya aron mas sayon ang pagmonitor ug pagdumala. Ang mga kasamtangang kompanya adunay 12 ka bulan aron motuman sa bag-ong kapital nga kinahanglanon o mokunhod sa gidaghanon sa ilang mga platform.
Gipalig-on usab sa SEC ang proteksyon sa mga nanghulam pinaagi sa pag-obligar sa mga kompanya nga ipasabot una ang tanang kondisyon sa loan ug makakuha og klaro nga kumpirmasyon sa borrower sa dili pa i-release ang kwarta. Gidili usab ang pagtratar o pagkontak sa mga tawo nga naa sa contact list o character references sa borrower isip guarantor gawas kung adunay ilang sinulat nga pagtugot. Ang mga kompanyang masayop sa dili makiangayon nga debt collection pagamultahan og dako ug mahimo pang suspindihon o tangtangon ang ilang certificate of authority.
Photo courtesy: Wikipedia
