Nagsugod na sa pagpatuman ang South Korea sa giusab nga balaod batok sa pagpakatap og sayop nga impormasyon sa internet. Ubos niining bag-ong balaod, ang mga taong tinuyo nga nagpasiugda sa pagpakatap og ilegal, sayop, o pagmanipula nga impormasyon mamahimong pabayron og hangtod ka lima ka pilo sa kantidad sa damyos nga nahimo. Og mapamatud-an ang kalapasan sa korte og mahukman nga sad-an mahimo usab nga multahan og hangtod sa 1 bilyon won (gibabana-bana nga $655,000).
Gipahinumdoman usab ang mga dagkong online platform sama sa Naver, Kakao, Google, ug Meta nga magbutang og sistema alang sa pag-report sa mga sayop nga impormasyon, ingon man ang pagpagawas og transparency report matag unom ka bulan mahitungod sa mga reklamo ug mga aksyon nga ilang gihimo. Gipatuman kini nga balaod taliwala sa nagkadaghang kaso sa online misinformation sa South Korea, lakip na ang mga mini nga report bahin sa politika ug mga sikat nga personalidad, sama sa usa ka YouTuber nga migamit matod pa og AI-generated audio aron maghimo og bakak nga alegasyon batok sa aktor nga si Kim Soo-hyun.
Bisan pa man niini, nabalaka ang oposisyon, mga grupo sa media, ug mga eksperto nga mamahimong malimitahan ang kagawasan sa pagpadayag tungod kay dili klaro ang kahulugan sa “false o manipulated information.” Matod nila, mahimo kining hinungdan sa sobra nga pagtangtang sa mga online content ug magduso sa gitawag nga self-censorship o kaugalingong pagpugong sa pagpadayag sa mga tiggamit sa internet.
Photo courtesy: Hwang Kwang-mo/Yonhap/AP Photo
