Kapin 10mil ka mga residente ang gipabakwit gikan sa ilang mga panimalay tungod sa grabeng wildfire nga nagpadayon sa habagatang bahin sa France, duol border sa Spain.
Sumala sa mga otoridad, wala pa gihapon makontrol ang dakong sunog nga nakaapekto sa dul-an 4,600 ektarya sa kalasangan sa French Pyrenees.
Gipasidan-an sa mga opisyal nga posibleng mosamot pa ang pagkaylap sa sunog tungod sa init nga panahon ug kusog nga hangin nga gilauman nga masinati sa mosunod nga mga oras.
Tungod sa dako nga kadaot, nagpadala ang European Union og upat ka water-bombing aircraft gikan sa Cyprus ug Sweden, uban sa kapin 100 ka bombero, aron motabang sa emergency response.
Naapektuhan usab sa wildfire ang lumba sa Tour de France, diin gipasarado sa publiko ang bahin sa ruta aron mahatagan og luna ang operasyon sa mga bombero.
Samtang, gipahayag ni European Commission President Ursula von der Leyen, nga nakighiusa ang European Union sa pagsuporta sa France sa pag-atubang sa dakong kalamidad.
Gilauman usab nga mosaka pag-usab sa 40 degrees Celsius ang temperatura sa France niining semanaha, samtang padayon usab ang grabeng heatwave sa Spain ug Portugal.
Photo Courtesy: RFI
