Patay ang usa ka 29-anyos nga mag-uuma human gipusil sa iyang kalalis nga natigayon sa may Sitio Calibran, Barangay Malagalad, Dumingag, Zamboanga del Sur, alas 10:30 sa gabii niadtong nakalabay nga adlaw.
Sumala sa imbestigasyon sa Dumingag Municipal Police Station, nagsugod ang insidente sa init nga panaglalis tali sa biktima ug sa suspetsado nga nagpangidaron 46 anyos nga mag-uuma.
Ang maong panaglalis niresulta sa pagkuha sa suspetsado sa iyang .357 caliber revolver ug gipusil ang biktima sa ulo, bukton ug sa may ubos nga bahin sa gusok, hinundan sa iyang hinanaling kamatayon.
Human sa pagpamusil, misibat dayon ang suspetsado paingon sa kabukiran sa Barangay Malagalad, apan gilayon siyang gigukod sa kapulisan pinaagi sa hot pursuit operation nga misangpot sa iyang pagdakop.
Narekober gikan sa suspetsado ang usa ka Smith & Wesson .357 Magnum revolver ug tulo ka basiyo sa bala.
Sa pagkakaron, anaa na sa kustodiya sa Dumingag Municipal Police Station ang suspetsado samtang giandam ang angayng kasong ipasaka batok kaniya.
Photo Courtesy: ZSPPO
