Priyoridad sa Local Government Unit sa Dumalinao ang pagtaod og dugang CCTV cameras ug solar-powered street lights sa mga lugar nga daghan ug tawo aron mapalig-on ang seguridad ug kaluwasan sa publiko.
Matud ni Dumalinao Mayor Raul F. Famor, base sa pondo nga igahin sa LGU, unang tutukan ang mga lugar sa poblacion nga medyo awaaw aron malikayan ang mga insidente sama sa pagpanulis nga natala kaniadto.
Gipatin-aw sa mayor nga ang maong proyekto makatabang sa mas paspas nga pagmonitor sa mga pampublikong lugar, pagpugong sa kriminalidad, ug paghatag ug mas hayag nga kadalanan ilabina sa kagabhion.
Dugang pa niya, tinguha sa LGU nga karong tuiga madugangan pa ang mga CCTV cameras ug solar street lights sa mga barangay sa Camanga, Sebucao, ug Tickwas, aron masiguro ang kaluwasan sa mga residente ug mga lumalabay.
Padayon usab ang LGU Dumalinao sa pagpatuman sa mga programa ug lakang nga nagpalig-on sa seguridad, kahapsay, ug kalinaw sa tibuok lungsod.
