Gipahunong na sa mga otoridad ang gihimong search and rescue operation alang sa namissing nga hiker didto sa Mt. Kalatungan Pangantucan, Bukidnon human sa makasaysayong pagsuhid sa dako kaayong dapit nga naggamit pa og mga dekalidad ug high-tech nga mga kahimanan niaging Hunyo 12-23, 2026.
Ang maong operasyon opisyal nang gibalhin ngadto sa mas lawom nga investigation phase o yugto sa imbestigasyon sa kapolisan aron masuta ang tinuod nga gidangatan sa biktima.
Nasayran sa pakighinabi sa Juander Radyo Malaybalay kang PCapt. Ernie Cabrera OIC sa Pangantucan Municipal Police Station nga miabot ngadto sa 654 ka ektarya ang gidak-on sa gisusi nga search area, diin gigamitan kini og mga thermal drones, mga trained tracking dogs, ug gipalig-on pa pinaagi sa combat tracking team sa Special Forces inabagan sa nagkadaiyang grupo nga miboluntaryo sa pagtabang.
Bisan pa man sa maong dakong pwersa, walay bisan usa ka timaan o mga personal nga butang sama sa sapatos sa biktima ang nakit-an nga mahimo untang magsilbing giya aron matultolan ang iyang nahimutangan.
Sa kasamtangan, ang kapolisan nagpadayon sa ilang pag-imbestigar ug padayon nga nagpaabot og mga tawag o impormasyon gikan sa ubang mga lugar basin adunay nakakita o nakamatikod sa biktima.
Photo Courtesy: Jirlbert Apa-ap/ Pangantucan MPS
