Migradwar ug nakakompleto sa ilang pagtuon ang kapin sa 500 ka Alternative Learning System (ALS) learners sa Malaybalay City Division atol sa 16th ALS Graduation and Completion Rites nga gipahigayon sa Bukidnon National High School Gymnasium niadtong Hunyo 25, 2026.
Sa esklusibong pakighinabi sa Juander Radyo Malaybalay kang Education Program Supervisor Virgilin R. Pizarro, gibutyag nga adunay kinatibuk-ang 88 ka elementary graduates ug 425 ka Junior High School completers nga nakapasar sa Accreditation and Equivalency Test nga gipahigayon niadtong Marso 28, 2025.
Nagsugod ang seremonyas alas 8:30 sa buntag ug natapos sa wala pa mag-alas dose sa udto. Gipasidunggan usab ang mga learners nga nakakuha og 90 pataas nga marka sa A&E Test tungod sa ilang talagsaong nabuhat.
Samtang, gipaabot usab ang pinansyal nga ayuda nga nagkantidad og ₱3,000 matag learner pinaagi sa mga pribadong individual aron makatabang sa ilang pagpadayon sa sunod nga ang-ang sa edukasyon.
Human sa graduation, ang mga elementary graduates mahimo nang mo-enroll sa Junior High School samtang ang mga Junior High completers mahimo nang mosulod sa Senior High School. Gipasabot usab nga adunay ALS Senior High School program nga nahiuyon sa regular nga kurikulum sa Department of Education.
Sa maong higayon, nag-awhag si Pizarro sa mga wala nakahuman sa ilang pag-eskwela tungod sa mga kalisdanan sa kinabuhi nga mosalmot sa ALS aron mapadayon ang ilang edukasyon ug mga damgo.
Alang sa mga interesado, mahimo silang moduol sa Pink House sa matag distrito diin andam motabang ang mga ALS teachers sa 10 ka distrito sa Malaybalay City para sa Elementary, Junior High School, ug Senior High School nga programa
Photo Courtesy: BNHS
