Gipaubos sa mandatory drug testing ang 299 ka mga empleyado sa lokal nga kagamhanan sa Valencia City isip kabahin sa pagpalig-on sa kampanya batok sa paggamit sa ilegal nga droga sa han-ay sa mga kawani sa gobyerno.
Gihimo ang ikatulong hugna sa maong pagsusi niadtong Hunyo 25, 2026 didto sa City Gymnasium and Cultural Center subay sa Memorandum Order No. 321 Series of 2026.
Lakip sa gipa-test ang mga empleyado ubos sa Regular, Casual, ug Job Order status gikan sa nagkalain-laing opisina sa siyudad, diin naglangkob kini sa 239 ka Watchman Personnel, 29 gikan sa City Civil Registrar’s Office, ug 31 gikan sa City Planning and Development Office.
Gidumala ang kalihokan sa City Anti-Drug Abuse Council o CADA pinaagi ni Coordinator Giovanni Asis uban sa authorized drug testing team aron masiguro ang hapsay ug legal nga proseso.
Gipasiugda usab ni Jun Galario, tigpamaba ni Mayor Amie G. Galario, nga importante ang ingon niini nga programa alang sa kaluwasan ug kaayohan sa tibuok komunidad sa Valencia City
Photo Courtesy: Valencia City LGU
