Nagpahimangno ang National Tobacco Administration (NTA) nga ang industriya sa tabako sa Pilipinas nag-atubang og seryosong hulga tungod sa padayon nga pagdagsang sa ilegal nga sigarilyo sa merkado.
Matod sa NTA, kapin sa 2.2 milyones ka tobacco farmers, trabahante, ug ilang pamilya ang posibleng maapektuhan sa nagkakusog nga illicit trade sa sigarilyo sa nasud.
Dili lamang kita sa gobyerno ang apektado, kondili apil usab ang mga komunidad nga nagdepende sa tabako isip pangunang panginabuhian.
Sa Third International Tobacco Summit 2026, giingon sa mga opisyal nga gibanabana nga ₱40 bilyon hangtod ₱52 bilyon kada tuig ang nawawong kita sa gobyerno tungod sa smuggled ug wala mabuhisan nga sigarilyo. Ang maong pundo unta magamit sa mga proyekto sa imprastraktura, serbisyong publiko, ug uban pang programa para sa katawhan.
Nanawagan ang mga partisipante sa summit sa mas hugot nga koordinasyon tali sa Bureau of Customs, Bureau of Internal Revenue, Philippine National Police, Department of Justice, ug mga lokal nga panggamhanan aron mapugngan ang smuggling ug uban pang ilegal nga operasyon.
Gipasiugda usab sa mga eksperto ang kahinungdanon sa kooperasyon sa tibuok Southeast Asia, tungod kay bilyon-bilyon ka dolyar usab ang nawawong kita sa rehiyon kada tuig tungod sa ilegal nga kalakalan sa tabako.
Samtang, giingon sa NTA nga padayon nga ginatuki ang paggamit sa modernong teknolohiya aron mas mapalig-on ang pagbantay sa galaw sa mga produktong tabako ug mapugngan ang pagsulod sa ilegal nga sigarilyo sa merkado.
Giklaro usab sa ahensya nga kinahanglan ang mas lig-on nga aksyon sa gobyerno ug pribadong sektor aron mapanalipdan ang industriya ug ang panginabuhian sa milyon-milyong Pilipino nga nagsalig niini.
Photo courtesy: Deccan Herald
