Opisyal nang gideklarar nga ubos sa Stable Internal Peace and Security (SIPS) ang tibuok Rehiyon sa Caraga niadtong Huwebes, usa ka mahinungdanong kalampusan nga nagtimaan sa katapusan sa dugay nang pakigbisog batok sa insurgency sa rehiyon.
Ang deklarasyon gihimo atol sa usa ka panagtigom nga gitambongan sa mga gobernador, mayor, mga ahensya sa gobyerno, pribadong sektor, ug mga kanhing sakop sa New People’s Army (NPA) didto sa dakbayan sa Butuan.
Mitambong usab sa maong kalihokan ang mga taas nga opisyal sa gobyerno lakip sila si Department of National Defense Undersecretary Angelito De Leon, National Task Force to End Local Communist Armed Conflict (NTF-ELCAC) Executive Director Undersecretary Ernesto Torres Jr., ug Office of the Presidential Adviser on Peace, Reconciliation and Unity Undersecretary Jonathan Ferdinand Miano.
Ang maong deklarasyon nahitabo human opisyal nang gideklarang insurgency-free ang tanang probinsya sa Caraga human sa pagkapukan sa North Eastern Mindanao Regional Committee sa NPA.
Una nang gideklarang insurgency-free ang Dinagat Islands niadtong Disyembre 12, 2014, gisundan sa Surigao del Norte niadtong Marso 15, 2024, Agusan del Norte niadtong Hunyo 5, 2026, ug Agusan del Sur, Surigao del Sur ug Butuan City niadtong Hunyo 15, 2026.
Girepresentar ni Lt. Gen. Adonis Ariel Orio, Commander sa Eastern Mindanao Command, si AFP Chief of Staff Gen. Romeo Brawner Jr. sa maong kalihokan.
Sa mensahe ni Brawner nga gibasa ni Orio, iyang giingon nga ang deklarasyon sa SIPS usa ka ebidensya sa dakong kalamboan nga naabot sa Caraga gikan sa mga tuig sa kagubot ngadto sa kaugmaon nga adunay kalinaw ug daghang oportunidad.
Samtang, gipadayag ni Aljon Intano, presidente sa United Caraganon for Peace and Development Federation, Inc. (UCPDFI), ang pasalamat sa mga kanhing rebelde tungod sa ilang pag-apil sa maong makasaysayanong kalihokan.
Matod niya, ang deklarasyon sa SIPS maghatag og higayon sa gatusan ka mga kanhing rebelde nga nagpabilin pa sa mga kampo militar tungod sa seguridad aron makabalik sa ilang pamilya ug komunidad ug makapuyo nga malinawon.
Kabahin usab sa programa ang pag-abli sa usa ka Peace Marker, nga gipangulohan nila Torres ug De Leon uban sa mga opisyal sa nasyonal ug lokal nga panggamhanan.
Mipirma usab ang mga partisipante sa usa ka Pledge of Commitment for Peace, diin ilang gipasaligan ang padayon nga pagpalambo sa usa ka makiangayon nga katilingban diin ang matag indibidwal adunay patas nga oportunidad ug proteksyon ilalom sa balaod, samtang ipadayon usab ang mga inisyatiba alang sa kalinaw ug kalamboan sa rehiyon.
Photo courtesy: Philippine News Agency
