Nadakpan sa hiniusang operasyon sa Philippine Drug Enforcement Agency (PDEA) ug Prosperidad Municipal Police Station ang usa ka 46-anyos nga lalaki nga giilang target sa kampanya batok sa ilegal nga droga sa Purok 6, Barangay Patin-ay, Prosperidad, Agusan del Sur, niadtong nakalabayng adlaw.
Gipahigayon ang operasyon sa PDEA Regional Office 13, pinaagi sa Agusan del Sur Provincial Office, kauban ang mga personnel sa Prosperidad Municipal Police Station.
Sa maong operasyon, nasakmit ang gibanabanang 20 gramos nga gidudahang shabu, nga nagkantidad og ₱136,000 base sa standard drug price. Narekober usab sa mga operatiba ang buy-bust money ug usa ka gold-colored nga Vivo Android cellphone.
Ang nadakpan nga suspek giila sa alyas nga “Ado” ug mag-atubang sa kasong paglapas sa Section 5, Article II sa Republic Act 9165 o Comprehensive Dangerous Drugs Act of 2002.
Photo courtesy: Prosperidad Municipal Police Station
