Nadakpan sa buy-bust operation sa kapulisan ang usa ka giilang high-value drug target ug nasakmit ang gibanabanang ₱27,200 nga kantidad sa gidudahang shabu sa Purok 4, Barangay Hubang, San Francisco, Agusan del Sur, niadtong nakalabay nga adlaw.
Ang suspek giila sa alyas nga “Nanding,” 53 anyos, ug residente sa Barangay 23, Butuan City. Gipahigayon ang operasyon alas 7:50 sa buntag sa Drug Enforcement Unit sa San Francisco Municipal Police Station, ubos sa pagdumala ni PMAJ Carmelo D. Malubay, Acting Chief of Police, inubanan sa Philippine Drug Enforcement Agency (PDEA) Agusan del Sur Provincial Office.
Nakuha gikan sa suspek ang upat ka heat-sealed plastic sachet nga adunay gituohang shabu, nga may gibug-aton nga mokabat sa upat ka gramo ug gibanabanang kantidad nga ₱27,200. Narekober usab ang ₱500 nga marked money nga gigamit sa operasyon, duha ka piraso sa aluminum foil, usa ka improvised tooter, usa ka Realme Android cellphone ug usa ka abuhon nga pouch.
Gidala ang suspek ug ang mga nakuhang ebidensiya sa San Francisco Municipal Police Station alang sa hustong dokumentasyon, imbentaryo ug uban pang proseso. Sa pagkakaron, giandam na ang kasong paglapas sa Republic Act 9165 o Comprehensive Dangerous Drugs Act of 2002 batok sa suspek.
Photo courtesy: PNP San Francisco Municipal Police Station
