Nagpahigayon og seminar kabahin sa kaluwasan ug pagpangandam sa emerhensiya ang 1st Davao del Norte Provincial Mobile Force Company (1st DNPMFC) sa Mangga Elementary School, Tagum City, Davao del Norte niadtong nakalabay nga adlaw.
Ang kalihokan gipangulohan ni PLTCOL Jess Anthony B. Maghirang, force commander sa maong yunit, uban sa pagdumala ni School Principal IV Miraluz O. Panaligan. Gihisgotan sa seminar ang kampanya batok sa bullying, pagpangandam sa posibleng pagpamusil sulod sa eskwelahan, nihilistic violent extremism ug pagpangabusong sekswal.
Gipasiugda sa mga police speaker nga sila Pat Andrew Von L. Jusay, Police Master Sergeant Ernie Absalon ug PCpl Lovely C. Alvarez ang kamahinungdanon sa pagtahod sa isigkatawo, pagkaandam sa emerhensiya, pagmatngon sa palibot ug hustong pagreport sa mga hulga ngadto sa mga otoridad.
Sumala sa kapulisan, gitumong sa kalihokan nga mapalambo ang kahibalo ug pagkaandam sa mga estudyante, magtutudlo ug kawani sa eskwelahan sa pag-atubang sa posibleng peligro.
Pinaagi niini, gipalig-on usab sa 1st DNPMFC ang panag-uban sa kapulisan ug komunidad sa pagpugong sa mga hulga ug pagpanalipod sa kaluwasan sa mga nag-eskwela ug mga personahe sa eskwelahan.
Photo Courtesy: PNP DavNor 1st PMFC
