Gipahigayon ang opisyal nga turnover ceremony sa bag-ong nahuman nga Tigabong Bridge nga nagkantidad og ₱60 milyon didto sa Barangay Tigabong, Cantilan, Surigao del Sur niadtong nakalabay nga adlaw.
Gitambongan ang maong seremonyas ni Surigao del Sur 1st District Representative Romeo S. Momo Sr., Mayor Philip Arreza Pichay, ug Sangguniang Panlalawigan Member Heinrich Pimentel. Mitambong usab sila si DPWH Surigao del Sur 1st District Engineer Engr. Leslie Anthony S. Molina, Barangay Captain Mercedes A. Coleto, ug uban pang lokal nga mga opisyal.
Mokabat sa 160 metros ang kinatibuk-ang gitas-on sa proyekto, lakip ang mga transition road, approach slab ug mismong tulay. Ang gilapdon sa tulay mokabat sa 9.54 metros, lakip na ang railing.
Gilauman nga ang bag-ong tulay maghatag og mas luwas nga agianan ug mas maayong koneksyon alang sa mga residente sa maong dapit diin matud pa dako kini nga tabang alang kanila ilabi na sa panahon sa kusog nga pag-ulan diin sagad masinati ang pagbaha nga dugay nang naghatag og kalisod sa komunidad.
photo courtesy:Municipality of Cantilan
