Gikumpirma sa Office of Civil Defense (OCD-13) Caraga nga pipila na ka lokal nga panggamhanan sa rehiyon ang nagdeklara og state of calamity tungod sa epekto sa hulaw nga may kalabotan sa El Niño. Samtang, mikabat na sa kapin ₱500,000 ang natala nga kadaot sa sektor sa agrikultura sa rehiyon.
Sumala ni Carlo Becera, tigpamaba sa OCD-13 Caraga, nagpadayon ang paghatag og ayuda ug suporta ngadto sa mga lokal nga panggamhanan nga apektado sa hulaw.
Gipaambit na usab sa OCD Caraga ang ilang action plan ngadto sa mga LGU aron mapalig-on ang koordinasyon ug masiguro ang epektibong pagpatuman sa mga lakang sa pagpangandam ug pagtubag sa posibleng pagsamot sa epekto sa El Niño.
Lakip sa mga gikabalak-an ang posibleng kakulangon sa tubig ug ang dugang nga kadaot sa mga pananom nga mahimong makaapekto sa panginabuhian sa mga mag-uuma ug sa suplay sa pagkaon sa rehiyon.
Pinaka unang nag deklarar ang tibuok probinsya sa Dinagat Islands, gisundan sa Butuan City, tibuok probinsya sa Agusan del Sur, lakip ang lungsod sa Carmen, Surigao del Sur ug Lanuza Surigao del Sur.
Tungod niini, gipadayon sa OCD Caraga ang pakigtambayayong sa mga lokal nga panggamhanan aron maandam ang mga komunidad ug mamenosan ang posibleng epekto sa hulaw, ilabi na sa sektor sa agrikultura ug sa mga lugar nga nag-atubang sa kakulangon sa tubig.
