Naluwas sa Philippine Coast Guard o PCG ang upat ka indibidwal, lakip ang usa ka bata, human sila ma-stranded sa Hagonoy Island sa Bislig City, Surigao del Sur, tungod sa kusog nga balod sa dagat.
Base sa report sa Coast Guard Sub-Station Bislig, nahitabo ang insidente niadtong nakalabay nga adlaw, samtang nagbiyahe ang mga biktima sakay sa gamay nga sakayan gikan sa Hagonoy Island padulong sa Barangay Labisma sa maong siyudad.
Apan tungod sa kusog nga balod, nasudlan og tubig ang ilang sakayan hinungdan nga napugos ang operator sa paghunong sa biyahe ug pagpangayo og tabang sa mga otoridad.
Misulay ang Coast Guard sa pag-adto sa isla aron luwason ang mga na-stranded, apan napakyas ang unang rescue attempt tungod sa dili maayong kahimtang sa dagat.
Niadtong Huwebes, Oktubre 15, gilihok sa Coast Guard Sub-Station Bislig ang ilang Deployable Response Group ug gigamit ang usa ka rigid-hull inflatable boat aron maabot ang mga indibidwal.
Malampusong nakit-an ug giluwas ang upat ka indibidwal nga anaa sa maayong kahimtang sa panglawas ug luwas nga gidala sa PICOP Pier 2 sa Bislig City aron hatagan og dugang nga tabang. Gikumpirma sa Coast Guard nga walay bisan usa sa mga giluwas ang naangol sa maong insidente.
Photo courtesy: CGSS Bislig
