Nakaabot na sa Hong Kong ang mga saging cardava nga gikan sa probinsya sa Davao del Norte, human sa kasabutan sa pagbaligya nga naporma atol sa Asia Fruit Logistica (AFL) Hong Kong 2026.
Gilaoman nga pinaagi niini, mas mapalapad ang merkado sa lokal nga saging sa gawas sa nasud. Ang Gerb Golden Hands Corp., nga nahimutang sa Tibal-og, Santo Tomas, Davao del Norte, nagpadala sa unang kargamento nga adunay 200 ka kahon sa cardava niadtong Oktubre 13, 2026.
Gilangkuban ang matag kahon sa 12 ka kilo, nga mikabat sa 2.4 metriko tonelada sa unang kargamento. Samtang dugang nga 250 ka kahon niadtong Oktubre 14, nga magdala sa kinatibuk-ang kargamento ngadto sa 450 ka kahon o 5.4 metriko tonelada.
Matod ni Agriculture Regional Technical Director for Operations Marie Ann Constantino, usa kini ka maayong lakang aron maablihan ang dugang nga oportunidad sa internasyonal nga merkado alang sa lokal nga mga mag-uuma sa saging.
Matod pa niya, padayon nga suportahan sa Department of Agriculture Region 11 ang mga mag-uuma pinaagi sa pagpalig-on sa koneksiyon sa mga mamalitay ug paghatag og dugang oportunidad sa pagbaligya, aron mas mailhan ug mahimong kompetitibo sa internasyonal nga merkado ang mga produktong pang-agrikultura sa Davao Region.
Photo Courtesy: Agri Info Davao
