Gipadayag sa aktres ug beauty queen nga si Bianca Manalo ang iyang pagdayeg ug suporta sa iyang kanhing uyab nga si Senador Win Gatchalian human kini mapili isip bag-ong Senate President.
Pinaagi sa iyang Instagram Stories, gipaabot ni Manalo ang iyang pagbati sa kalampusan sa senador ug miingon nga magpabilin siyang mapahitas-on sa mga nahimo niini. Dugang pa niya nga ang maong posisyon angay lamang kang Gatchalian ug nag-ingon usab siya nga gikinahanglan sa nasod ang matang sa liderato nga iyang mahatag.
Gishare usab ni Gatchalian ang mensahe ni Manalo sa iyang social media account apan wala na kini magdugang og komento.
Kahinumduman nga nagsugod ang relasyon nila Manalo ug Gatchalian niadtong 2018, apan migawas ang mga espekulasyon sa ilang panagbulag niadtong 2025. Bisan wala sila opisyal nga mipahibalo sa ilang breakup, nagpasabot si Gatchalian sa sayong bahin ning tuiga nga wala na sila’y relasyon.
Samtang, giklaro usab sa Sparkle GMA Artist Center nga single karon si Bianca Manalo ug wala’y relasyon sa bisan kinsa.
Si Gatchalian nahimong Senate President human makabaton sa gikinahanglang suporta sa Senado ug mipuli sa kanhing liderato sa maong kapulungan.
Photo Courtesy: PEP.ph
