Namahayag si Senador Ping Lacson, nga niabot sa P700 milyones nga pundo sa katawhan ang nausik sa pamunoan ni kanhi Senate President Alan Peter Cayetano.
Matod niini nga sa sulod sa 28 ka adlaw nga pamunoan ni Cayetano sa Senado, di mominos sa P700 milyones nga kwarta sa katawhan ang nausik.
Gitumbok ni Lacson nga nausik ang mga adlaw tungod kay wala makatrabaho ang Senado, lakip na ang pagpamusil nga nahitabo sulod sa Senado, ang pag-eskapo ni Senador Bato dela Rosa nga ubos sa “protective custody” sa Senado, ang tulo ka adlaw nga boycott sa sesyon, napakyas ang pagsuway sa destabilisasyon ug mga bogus nga hearing bisan pa sa kausaban sa liderato.
Una nang namahayag si Senate President Win Gatchalian nga mogasto ang Senado og gibana-bana nga P25 milyones matag adlaw kon masuspenso ang mga sesyon ug walay plenary works.
Gitubag kini ni Cayetano pinaagi sa Facebook Live diin matod niya nga susama ra usab ang inadlaw nga gasto o pundo ni Gatchalian.
Sa laktod nga pagkasulti, matod ni Cayetano, bisan kinsa nga presidente sa Senado mogasto gyud og P25 milyones matag adlaw.
Wala gilimod ni Cayetano ang pasangil ni Lacson nga nausik ang pundo ubos sa iyang pamunoan ug nagpasumbingay pa kini nila ni Senador Lacson nga maayo mo-devide hinungdan nga nagkabahin-bahin karon ang Senado.
Photo courtesy:facebook.com/alanpetercayetano
