Gihingusgan sa lokal nga kagamhanan sa dakbayan sa Mandaue ang pagpanghinlo sa mga drainage ug kanal aron malikayan ang pagbaha atol sa ting-ulan. Gideploy ang mga suction truck sa Barangay Canduman diin gipangulohan sa City Engineering Office ang paglimpyo ug pag-ukab sa mga kanal.
Atol sa operasyon, nakit-an ang baga nga lapok ug nagtapok nga basura nga maoy hinungdan sa pagbara sa dagan sa tubig.
Kauban sa operasyon ang mga opisyal sa Barangay Canduman, diin nabantayan usab ang pipila ka drainage nga miawas na sa karsada ug nahimong hinungdan sa kabalaka sa mga motorista.
Samtang, nanawagan si Mandaue City Mayor Thadeo “Jonkie” Ouano sa publiko nga magtinabangay ug mahimong responsable sa hustong paglabay sa basura aron masiguro ang kaluwasan sa komunidad ug malikayan ang disgrasya.
Photo Courtesy: CDN Digital
