24 oras nga gibantayan ang seguridad sa Cagayan de Oro City pinaagi sa Task Force Oro kauban ang Cagayan de Oro City Police Office (COCPO) aron masiguro ang kalinaw ug kahapsay sa syudad.
Matod pa ni Task Force Oro Commanding Officer Col Manuel Estanilla, wala gihapon sila mihunong sa pagpahigayon og mga checkpoint operation sa nagkalainlaing bahin sa syudad isip kabahin sa ilang kampanya batok sa kriminalidad ug uban pang posibleng hulga sa seguridad.
Gibutyag usab ni Estanilla nga adunay mga K9 dogs ang Task Force Oro nga ginagamit sa mga operasyon aron mapalig-on pa ang ilang kakayahan sa pagmonitor ug pagseguro sa kaluwasan sa publiko.
Dugang pa niya, dako ang mahatag nga tabang sa mga stakeholders ug residente pinaagi sa pagreport dayon sa mga kadudahang kalihokan ug pagpakigkoordinar sa mga otoridad.
Gani, giaghat sa Task Force Oro ang publiko nga magpabiling mabinantayon ug makigtambayayong sa mga law enforcement agencies aron mapadayon ang malinawon ug luwas nga palibot sa syudad.
Photo courtesy: Task Force Oro/ Facebook
