Gipalig-on sa Bureau of Customs Port of Cagayan de Oro ug sa Philippine Exporters Foundation Region 10 Chapter Incorporated ang ilang panagtambayayong aron mapadali ang proseso sa eksport ug madugangan pa ang oportunidad sa negosyo ug pamuhunan sa Northern Mindanao.
Niadtong Hunyo 16, gidawat ni District Collector Atty. Manuel O. Zurbito Jr. ang mga opisyal sa PhilExport 10A atol sa usa ka courtesy visit nga gipahigayon sa Bureau of Customs Port sa Macabalan, Cagayan de Oro City.
Gipangulohan ni PhilExport 10A President Nestor Viado ang delegasyon diin ilang gitaho ang padayon nga pagtubo sa export industry sa rehiyon ug ang dako nga kontribusyon sa ekonomiya sa Northern Mindanao.
Sa maong panagtigom, gipasalig sa Bureau of Customs ang ilang suporta sa pagsulbad sa mga kabalaka nga may kalabutan sa export processes aron mas mapadali ang kalihokan sa mga exporters ug makadani pa og daghang mamumuhunan sa rehiyon.
Gidayeg usab sa PhilExport ang lakang ni Bureau of Customs Commissioner Ariel F. Nepomuceno sa pagpatuman sa tulo ka tuig nga validaity sa exporter registration ubos sa Client Profile Registration System o CPRS.
Sumala sa mga opisyal, ang maong polisiya makatabang sa pagpasayon sa transaksyon sa mga exporters, pagpalig-on sa data integrity ug pagdasig sa mas episyenteng kalihokan sa sektor sa eksport sa nasud.
Photo Courtesy:Bureau of Customs – Port of Cagayan de Oro
