Patay ang usa ka 21-anyos nga babaye sa Brazil human mahulog gikan sa usa ka taytan atol sa rope jump tungod kay wala siya mahiktan og safety cord sa Skeleton Bridge sa estado sa São Paulo.
Sa mga video nga mikaylap online, makita nga gilabay kini sa duha ka lalaki gikan sa tulay samtang ang mga nakakita misinggit nga wala diay nakataod ang safety cord. Matod sa kapulisan, wala masiguro pag-ayo ang safety equipment sa dihang milukso ang biktima.
Tulo ka lalaki ang gidakop ug giakusahan og homicide tungod kay nasayod sila sa peligro apan mipadayon gihapon sa aktibidad. Giila sa lokal nga media ang biktima nga si Maria Eduarda Rodrigues de Freitas, nga giingong nahulog og mga 40 metros.
Sa wala pa ang aksidente, nag-post si de Freitas sa Instagram og hulagway sa lugar uban sa caption nga, “Kinsa kaha tong buang nga nitugot nako nga molukso gikan sa taytayan?”
Nagpadayon pa ang imbestigasyon aron masayran ang tibuok kahimtang ug ang responsibilidad sa mga nalambigit.
Photo courtesy: Thought Catalog
