Gipalig-on sa kagamhanan ang mga paningkamot aron mapugngan ang pagdagsa sa red-striped soft scale insect (RSSI), usa ka peste nga makadaot sa mga umahan sa tubo.
Pasanayon sa Department of Agriculture (DA) ang usa ka natural nga fungus nga gamiton isip biological control batok sa maong insekto. Matod ni Agriculture Secretary Francisco Tiu Laurel Jr., ang maong biological agents ipakatap sa labing menos 75,000 ka ektarya sa mga tanoman sa tubo.
Gihimo usab sa Sugar Regulatory Administration (SRA) ang paggamit og drone sa pagbutang og insecticide sa mga apektadong umahan sa Negros Occidental aron maminusan ang kadaot sa tanom.
Gibutyag sa SRA nga ang infestation sa Negros Occidental ug Negros Oriental mahimong nakaapekto na sa kapin sa 30 porsyento sa natamnan nga lugar, ug mokabat na sa 4,600 ka ektarya ang nakumpirmang natakdan.
Aduna usab mga report nga mikatag na ang peste sa Iloilo, Capiz, Leyte, ug pipila ka bahin sa Mindanao.
Una nga namatikdan ang RSSI niadtong 2022 ug mahimo kining makapakunhod sa asukal sa tubo hangtod sa 50 porsyento kung dili masumpo. Sa pagkakaron, naggahin ang SRA og P8 milyon alang sa pagtubag sa problema, samtang andam ang DA sa dugang pondo alang sa produksyon sa fungus ug AI-based nga pagmonitor sa peste.
Photo courtesy:Philippine News Agency
