Padayon nga ablihan alang sa mga turista ang Kawasan Falls bisan pa sa giplanong 12 ka programa nga ipatuman sa lugar aron mas mapalig-on ang pagdumala ug pagpanalipod sa usa sa labing inila nga destinasyon sa turismo sa Sugbo.
Matud ni Cebu Governor Pamela Baricuatro, dili isira ang Kawasan Falls atol sa implementasyon sa mga proyekto tungod kay himuon kini sa tagsa-tagsang bahin o portion sa lugar aron makapadayon gihapon ang pagbisita sa mga turista ug dili maapektuhan pag-ayo ang panginabuhian sa mga komunidad nga nagsalig sa turismo.
Giingon sa gobernadora nga adunay 12 ka programa nga ipatuman sa lugar, lakip ang pagpalig-on sa pagdumala sa mga bisita ug pagpreserbar sa kinaiyahan sa maong atraksyon.
Gipahibalo usab niini nga magbutang og monitoring system aron masubay ang dagan sa mga kalihokan sa Kawasan Falls ug masiguro ang kaluwasan sa mga turista ug mga trabahante sa lugar.
Gipasalig usab sa Gobernadora nga prayoridad ang pagtukod ug pagpaayo sa mga comfort rooms ug uban pang pasilidad aron mas mapalambo ang kasinatian sa mga lokal ug langyawng turista nga mobisita sa maong lugar.
Dugang ni Baricuatro, usa sa mga hinungdan sa pagpatuman sa mga programa mao ang pagpreserbar sa natural nga kahinguhaan sa Kawasan Falls ug pagsiguro nga magpabiling limpyo, luwas ug malungtaron ang maong destinasyon alang sa umaabot nga mga henerasyon.
Samtang adunay nagkalainlaing reaksyon ug komentaryo sa social media kabahin sa mga plano sa kagamhanan, giingon sa gobernadora nga dili siya matarog sa mga kasaba sa online platforms basta alang kini sa kaayohan sa Sugbo ug sa mga Sugboanon.
Gidugang pa niya nga ang iyang administrasyon nagpabiling pro-Cebu ug nagtutok sa mga programa nga adunay dugayng benepisyo sa probinsya.
Photo courtesy: vickyflipfloptravels.com
