Gipasidunggan sa Sangguniang Panlalawigan sa Bukidnon ang mga batan-ong atleta gikan sa Lowan-Lowan Aqua Elite sa lungsod sa Quezon ug sa United Dolphins Swim Team tungod sa ilang talagsaong pasundayag sa Milo National Inter-School Long Course Swimming Championship 2026. Ang maong nasudnong kompetisyon gipahigayon niadtong Marso 28 hangtod 29 sa Davao del Sur Sports Complex nga nahimutang sa Digos City.
Pinaagi sa dungan nga pag-aproba sa Resolution No. 2026-1749 ug Resolution No. 2026-1748 atol sa ilang ika-39 nga Regular Session, pormal nga gipadayag sa provincial board ang ilang pagdayeg. Sumala sa konseho, ang paghakot og daghang medalya sa mga atleta nagdala og dako nga dungog ug garbo alang sa tibuok lalawigan sa Bukidnon.
Naggikan ang mga swimmers nga sakop sa United Dolphins Swim Team sa nagkalainlaing lungsod sama sa Don Carlos, Dangcagan, Kibawe, ug Damulog diin sila nagpapili sa elementarya ug sekondaryang lebel. Gitala sa resolusyon nga ang kalampusan sa mga bata nagpakita sa madasigon ug malampuson nga paglambo sa grassroots sports development sa probinsya.
Gawas sa paghatag og opisyal nga pag-ila, gihisgutan usab sa Sangguniang Panlalawigan nga ang kalamposan sa mga atleta nagsilbing dako nga inspirasyon sa uban pang mga estudyante ug kabatan-onang Bukidnon. Ang maong mga resolusyon giaprobahan nga walay bisan usa ka pagsupak, ug ang opisyal nga mga kopya niini daling ipahatod ngadto sa mga atleta ug sa ilang mga swim team.
Photo Courtesy: SP – Bukidnon
