Nagtapok ang 70 ka mga batan-ong lider gikan sa 14 ka barangay sakop sa lungsod Lantapan alang sa “Youth Summit 2026” kagahapon Hunyo 16, 2026.
Nagtumong ang kalihukan sa pagbansay kanila nga mahimong mga responsableng change makers, masulundon sa balaod, ug maayong mga lider sa komunidad taliwala sa mga hagit sa kasamtangang pamulitika sa nasod.
Sumala ni Municipal Local Youth Development Officer Analiza Navarro Calipusan, sa exclusive nga pakighinabi sa Juander Radyo Malaybalay ang mga partisipante gilangkuban sa mga SK Chairpersons kauban ang ilang mga Kagawad, sakop sa Local Youth Development Council (LYDC), ug mga Out-of-School Youth (OSY). Tinguha sa summit nga matamnan ang kasingkasing sa kabatan-onan og tiunay nga panglantaw alang sa kaayohan sa katawhan
Namulong sa summit sila si Dr. Lorenzo Dinlayan III ug Assistant Professor Ryan Cris Handugan gikan sa Bukidnon State University aron maghisgot sa leadership ug good governance, kauban ang Philippine Army alang sa peace and order. Gawas niini, nag-andam na usab ang lungsod alang sa mas dako nga Youth Congress karong Hulyo.
Gidasig sab ni Calipusan ang mga batan-ong lider nga gamiton ang ilang kaalam aron mabag-o ang dagan sa politika ug pagserbisyo sa nasod ilabina taliwala sa mga kagubot nga nasaksihan karon sa Senado ug Kongreso—tungod kay sila ang tinuod nga kaugmaon sa Pilipinas.
Photo Courtesy: SK –Federation Lantapan
