Nagpatuman na og mga intervention measures ang Cagayan de Oro City Police Office (COCPO) aron malikayan ang mga disgrasya sa kadalanan, ilabina human sa pagkamatay sa usa ka patrolman sa Barangay Lumbia sa syudad.
Matod pa ni PCol Dexter Paje, nga base sa ilang assessment, adunay daghang hinungdan nganong mahitabo ang mga aksidente sa dalan.
Lakip sa ilang nakita ang pamatasan o driving behavior sa mga motorista, ingon man ang kahimtang ug disenyo sa pipila ka mga karsada.
Gani, padayon karon ang koordinasyon ug pagpahigayon og mga lakang sa COCPO aron mapalig-on ang road safety ug mapahimangnoan ang mga motorista sa kahinungdanon sa responsableng pagdrayb.
Mahinumduman nga namatay ang usa ka patrolman human maaksidente ang iyang motorsiklo ug mibangga sa usa ka dakong kahoy sa Gran Europa, Barangay Lumbia. Gituohang nawad-an kini og kontrol sa pagdagan sa motorsiklo sa wala pa nahitabo ang bangga.
Photo courtesy: PNP Cagayan de Oro City Police Office
