Gipunting sa Kilusang Mayo Uno o KMU-Northern Mindanao nga ang kakulang sa panginabuhian ug nagpadayong kapobrihon ang usa sa mga nag-unang hinungdan nganong wala pa mahunong ang child labor sa Pilipinas.
Sumala ni Tita Hadman sa KMU, daghang kabataan ang mapugos sa pagtrabaho bisan sa sayong edad aron makatabang sa ilang ginikanan ug makasuporta sa adlaw-adlaw nga panginahanglan sa pamilya, ilabina sa pagkaon.
Matod pa ni Hadman, ang mga bata nagdako taliwala sa kakabus ug kakulang sa oportunidad, hinungdan nga sila mismo ang mangitag paagi aron makaamot sa kita sa panimalay.
Gidugang sa grupo nga dili igo ang pagdili lamang sa child labor, kondili gikinahanglan usab ang konkretong mga programa ug solusyon gikan sa gobyerno aron masulbad ang kakabus ug kakulang sa trabaho nga ugat sa problema.
Giawhag sa KMU ang mga may katungdanan nga palig-onon ang mga programa sa panginabuhian ug social benefits aron mapanalipdan ang mga kabataan ug matuman ang ilang katungod sa edukasyon ug maayong kaugmaon.
Photo courtesy: UCA News
