Gipalapad ug mas gipahugtan pa karon sa nagkadaiyang mga ahensya ang search and rescue operation sa kabukiran sa Mt. Kalatungan Range Natural Park aron pangitaon ang na-missing nga 31-anyos nga climber nga si Alkharj Zamayla, kinsa ulahing nakita niadtong Hunyo 12, 2026.
Hugot nga nakig-alayon ang Provincial Disaster Risk Reduction and Management Office (PDRRMO) sa Bukidnon nagdto sa Protected Area Management Office (PAMO)-Mt. Kalatungan ug sa lokal nga kagamhanan sa Pangantucan aron mapaspasan ang pagpangita sa maong climber.
Gipangunahan ni Israel Johan M. Damasco Jr., DRRMO IV sa PDRRMO-Bukidnon, ang Mountain Search and Rescue (MoSAR) team sa maong operasyon.
Gihimo ang dinalian nga paglihok human nangayo og tabang pinaagi sa social media ang pamilya ni Zamayla.
Aron mas mapadali ang pagpangita sa biktima, mitabang na usab sa gipalapad nga operasyon ang pwersa sa kapulisan, kasundaluhan, ug uban pang mga ahensya ug volunteer groups.
Sa kasamtangan, padayon nga gisuhid sa mga rescue teams ang malisod nga bahin sa Mt. Kalatungan.
Nagpabilin usab nga malaumon ang pamilya ug mga otoridad nga makit-an ug maluwas si Zamayla sa labing daling panahon
Photo Courtesy: LGU – Bukidnon
