Giimbestigahan na karon sa Municipal Health Office (MHO) ang kalit ug paspas nga pagdagsa sa mga langaw sa Barangay Sto. Niño. Kung asa gihimo ang dinalian nga aksyon human makadawat og opisyal nga reklamo ang buhatan gikan sa mga apektadong residente sa maong dapit.
Base sa gipahigayon nga pagsusi ni Municipal Sanitary Inspector Bryan Degamo, ang presensya sa mga poultry farms ug backyard piggeries maoy giila nga posibleng hinungdan sa peste. Nasayran nga adunay mga residente nga nagbuhi og mga hayop nga walay saktong permit gikan sa lokal nga kagamhanan.
Nakit-an usab sa imbestigasyon nga ang uban niini anaa ra mismo nahimutang sa mga residential area. Gani, adunay mga tag-iya nga nagbuhi og sobra sa 50 ka buok manok o baboy, nga usa ka tin-aw nga kalapasan sa naglungtad nga regulasyon sa Local Government Unit (LGU).
Tungod niini, nagpahinumdom ang LGU nga ang pagtukod og backyard livestock o poultry nanginahanglan og “No Objection” gikan sa mga silingan ug saktong assessment. Magpahigayon usab og dialogue ang barangay ug LGU uban sa mga tag-iya sa farm aron plantsahon ang legal nga solusyon ug preventive measures
Samtang nagpadayon ang monitoring sa kagamhanan, nanawagan si Inspector Degamo sa mga residente nga magpabiling limpyo sa palibot ug tarongon ang pagdumala sa basura. Kini nga lakang importante aron mapugngan ang pagdaghan sa langaw ug mapanalipdan ang kahimsog sa tanan
Photo Courtesy: LGU – Manolo Fortich
