Nakit-ang patay ang usa ka security guard sulod sa DPWH Depot sa Purok 17, Barangay Casisang, alas 6:44 sa buntag niadtong Hunyo 15, 2026,
Base sa inisyal nga imbestigasyon, walay nakitang timailhan nga foul play sa patayng lawas sa biktima giilang si Rolando Cabana Cagbay, 56-anyos taga Purok – 8 barangay 9 sa syudad.
Sumala pa, nadiskubrehan ang biktima sa iyang kauban sa trabaho pinaagi sa bintana sa naka-lock nga guardhouse. Bisan pa sa makadaghang pagtawag, wala na kini motubag, ug tungod kay naka-lock ang pultahan, gipahibalo dayon niini ang mga awtoridad.
Sa pagresponde sa kapulisan, nakita ang biktima nga naglingkod pa sa lingkuranan nga adunay nebulizer nga nakakabit sa iyang nawong.
Nakita usab sa sulod ang mga tambal nga may kalabotan sa asthma. Naka-duty ang biktima gikan alas 7:00 sa buntag sa Hunyo 14 hangtod alas 7:00 sa buntag sa Hunyo 15.
Gidala ang lawas sa Bukidnon Provincial Medical Center alang sa pormal nga deklarasyon sa kamatayon samtang nagpadayon pa ang imbestigasyon.
Photo Courtesy: Malaybalay City PNP
