Nakaplagang patay ang usa ka 28-anyos nga Persons Deprived of Liberty (PDL) human gituohang nagkutlo sa iyang kaugalingong kinabuhi sulod sa Bukidnon Provincial Detention and Rehabilitation Center (PDRC) sa Barangay Casisang, Malaybalay City, niadtong Hunyo 13, 2026.
Sa inisyal nga findings sa Malaybalay City Police Station, walay nakitang foul play ang mga otoridad sa maong insidente nga nahitabo pasado alas 3 sa kadlawon.
Matod sa report sa kapulisan, ang biktima nga usa ka residente sa Lantapan, Bukidnon, nakit-an na lang nga nagbuy-od sa salog sa Cell Number 6. Gitangtang na kini sa iyang kaubang piniriso gikan sa pagkagapos sulod sa comfort room.
Nasayran nga napreso ang biktima niadtong Enero 21, 2026 tungod sa duha ka kaso nga iyang giatubang sa korte.
Subay sa pamahayag sa iyang mga kaubang priso, nailhan ang biktima nga hilumon kaayo ug dili kini hilig makig-uban o makig-istorya sa uban sulod sa selda. Nadawat sa kapulisan ang taho gikan mismo sa Jail Warden sa PDRC human madiskobrehan ang trahedya.
Sa pagkakaron, nagpadayon pa ang lawom nga pagsusi sa mga otoridad aron hingpit nga masuta ang tinuod nga rason sa kalit nga paghunos sa kinabuhi sa maong piniriso.
Photo Courtesy: Malaybalay City PNP
